லாக் டவுன் – சினிமா விமர்சனம்

நடுத்தர குடும்பத்தில் பிறந்த அனுபமா, ஐடி நிறுவனத்தில் வேலை கிடைக்க வேண்டும் என்ற கனவுடன் முயற்சி செய்து வருகிறார். எதிர்கால நம்பிக்கையுடன் நகரும் அவரது வாழ்க்கை, தோழி ஒருவரின் அழைப்பை ஏற்று ஒரு பார்ட்டிக்கு சென்றதும் திடீரென திருப்பம் பெறுகிறது. அங்கு மது அருந்தி போதையில் மயங்கும் அனுபமா, மறுநாள் என்ன நடந்தது என்பதே தெரியாமல் வீட்டுக்குத் திரும்புகிறார். சில நாட்களுக்குப் பிறகு அவர் கர்ப்பமாக இருப்பது தெரியவர, வாழ்க்கை முழுவதும் கேள்விக்குறியாக மாறுகிறது.
தன்னை யார் பாலியல் வன்கொடுமை செய்தார்கள் என்பது தெரியாமல் மன உளைச்சலுக்கு ஆளாகும் அனுபமா, இந்த உண்மை குடும்பத்துக்குத் தெரியக்கூடாது என்ற பயத்தில் கர்ப்பத்தை கலைக்க முடிவு செய்கிறார். ஆனால் அதே நேரத்தில் கொரோனா லாக்டவுன் அறிவிக்கப்பட, எந்த நடவடிக்கையும் எடுக்க முடியாத சூழலில் சிக்குகிறார். இறுதியில் அவர் எடுக்கும் தீர்மானமே படத்தின் கிளைமாக்ஸ்.
இதுவரை ஹீரோக்களுக்கு ஜோடியாகவும், டூயட் பாடல்களிலும் மட்டுமே நடித்துக் கொண்டிருந்த அனுபமா பரமேஸ்வரன், லாக் டவுன் மூலம் தன்னுள் ஒளிந்திருந்த நடிகையை வலுவாக வெளிப்படுத்தியுள்ளார். இந்த சவாலான கதாபாத்திரம், வித்யா பாலன் நடித்த கஹானி படத்தை நினைவூட்டும் வகையில் மனரீதியான அழுத்தம் நிறைந்தது. வளர்ந்து வரும் நடிகைகள் தயங்கக்கூடிய இத்தகைய வேடத்தை, உடல் மற்றும் மன வலிமையுடன் அவர் ஏற்று நடித்திருப்பது பாராட்டுக்குரியது.
பார்ட்டி காட்சிகளில் வரும் அவரது எதிர்பாராத மாற்றமும், கர்ப்பம் தெரிய வந்ததும் அதை குடும்பத்தினரிடமிருந்து மறைக்க டாக்டர்களின் கால்களில் விழுந்து கெஞ்சும் தருணங்களும், தவறான சூழலில் சிக்கிய இளம் பெண்ணின் மனநிலையை நேர்மையாக வெளிப்படுத்துகின்றன.
நடுத்தர குடும்ப பெற்றோர்களாக சார்லி, நிரோஷா இயல்பான நடிப்பை வழங்கியுள்ளனர். லிவிங்ஸ்டன், ராஜ்குமார், லொள்ளு சபா மாறன் உள்ளிட்ட துணை நடிகர்களும் கதைக்கு தேவையான பங்களிப்பை அளித்துள்ளனர்.
லைக்கா புரொடக்ஷன் சார்பில் சுபாஷ்கரன் தயாரித்துள்ள இப்படத்திற்கு என்.ஆர். ரகுநாதன் மற்றும் சித்தார்த் விபின் இசையமைத்துள்ளனர். பாடல்கள் சோகத்தை பிழிந்து எடுக்க, கே.ஏ. சக்திவேல் ஒளிப்பதிவு வெறுமையான கலர் டோன்களில் கதையின் வலியை ஆழமாக பதிவு செய்கிறது.
லாக் டவுன் — பெண்கள் பாதுகாப்பு குறித்த எச்சரிக்கையாகவும், சமூகப் பொறுப்புணர்வு கொண்ட படமாகவும் கவனம் ஈர்க்கிறது.