தூய்மை பணியாளர் பத்மாவின் பாதம் தொட்டு… நடிகர் பார்த்திபன் நெகிழ்ச்சி செயல்

திரையுலகில் எப்போதும் வித்தியாசமான சிந்தனைகளுக்கும், மனிதாபிமான செயல்களுக்கும் பெயர் பெற்றவர் நடிகர் மற்றும் இயக்குநர் இராதாகிருஷ்ணன் பார்த்திபன். அண்மையில் குப்பையில் கண்டெடுத்த 45 சவரன் தங்க நகைகளை உரியவரிடம் ஒப்படைத்த தூய்மைப் பணியாளர் பத்மாவின் நேர்மையை உலகமே பாராட்டி வரும் நிலையில், பார்த்திபன் செய்த ஒரு செயல் ஒட்டுமொத்த தமிழகத்தையும் நெகிழ வைத்துள்ளது.

சென்னை தியாகராய நகரில் பணியாற்றும் தூய்மைப் பணியாளர் பத்மா, கடந்த ஜனவரி மாதம் குப்பையில் கிடந்த சுமார் 45 லட்சம் ரூபாய் மதிப்புள்ள 45 சவரன் தங்க நகைகளைத் தவறவிடாமல் காவல்துறையிடம் ஒப்படைத்தார். இவருக்கு ஏற்கனவே தமிழக முதல்வர் மு.க.ஸ்டாலின் 1 லட்சம் ரூபாய் ஊக்கத்தொகை வழங்கினார். மேலும், நடிகர் ரஜினிகாந்த் இவரை நேரில் அழைத்துத் தங்கச் சங்கிலி அணிவித்துப் பாராட்டினார். அந்த வரிசையில், தற்போது நடிகர் பார்த்திபன் பத்மாவை ஒரு ராணியைப் போலக் கௌரவப்படுத்தியுள்ளார்.

எத்திராஜ் கல்லூரியில் நடந்த நெகிழ்ச்சி

சென்னையிலுள்ள எத்திராஜ் கல்லூரியில் நடைபெற்ற ஒரு விழாவிற்கு நடிகர் பார்த்திபன் தலைமை விருந்தினராக அழைக்கப்பட்டிருந்தார். ஆனால், அங்கு அவர் செய்த மாற்றம் அனைவரையும் ஆச்சரியப்படுத்தியது. தன்னை விருந்தினராக அழைத்த கல்லூரியிடம், “நான் வெறும் விருந்தினராக (Guest) வருகிறேன், இன்றைய விழாவின் தலைமை விருந்தினராக (Chief Guest) திருமதி பத்மா அவர்களையே அழைத்து வருகிறேன்” எனக் கூறி அவரை அழைத்துச் சென்றார்.

மேடையில் பத்மா அவர்களுக்குப் பொன்னாடை போர்த்தி, அவருக்கு ஒரு புதிய புடவையைப் பரிசளித்தார். அதுமட்டுமின்றி, அவருக்கு ஒரு அழகான கிரீடம் சூட்டி “இவர் தான் உண்மையான உலக அழகி” என வர்ணித்தார். விழாவின் உச்சகட்டமாக, பத்மா அவர்களை நாற்காலியில் அமர வைத்து, அவருக்குப் புதிய பாதணிகளை (சப்பல்) பார்த்திபனே தனது கைகளால் அணிவித்தார். பின்னர் அவரது பாதம் தொட்டு வணங்கி பாத பூஜை செய்தார்.

பார்த்திபனின் உருக்கமான பதிவு

இது குறித்து தனது எக்ஸ் (X) தளத்தில் பதிவிட்டுள்ள பார்த்திபன், “தங்கத்தின் மதிப்பு ஏற ஏற, மனிதத்தின் மரியாதை குறைந்துகொண்டே போகிறது. ஒரு கிராம் தங்கம் ஒரு லட்சம் ரூபாயை நெருங்கும் போது மனிதநேயம் கொல்லப்படும். ஆனால், வருடத்தின் 360 நாட்களும் உழைக்கும் பத்மா அவர்கள், குப்பையில் கண்டெடுத்த 360 கிராம் (45 சவரன்) நகையை உரியவரிடம் ஒப்படைத்து, ஒரு உன்னத மனுஷியாக அவதாரம் எடுத்துள்ளார். அவருக்குப் பாத பூஜை செய்து, கிரீடம் சூட்டியதன் மூலம் நான் பேரழகன் ஆனேன்” என நெகிழ்ச்சியுடன் குறிப்பிட்டுள்ளார்.

தூய்மைப் பணியாளர்களின் சீருடையைச் சிலர் கௌரவக் குறைவாகக் கருதும் நிலையில், பத்மா தனது நேர்மையால் அந்தச் சீருடைக்கே பெருமை சேர்த்துள்ளதாகப் பார்த்திபன் புகழாரம் சூட்டியுள்ளார். பார்த்திபனின் இந்த மனிதாபிமானச் செயல் தொடர்பான வீடியோக்கள் தற்போது சமூக வலைதளங்களில் காட்டுத்தீ போலப் பரவி வருகின்றன.