இந்தியாவின் மக்கள் தொகை கட்டமைப்பில் பெரும் மாற்றம் ஏற்பட்டு வருவதை இந்திய ரிசர்வ் வங்கியின் (RBI) சமீபத்திய ஆய்வு அறிக்கை வெளிச்சத்திற்கு கொண்டு வந்துள்ளது. நாடு முழுவதும் இளைஞர்களின் எண்ணிக்கை குறைந்து, முதியவர்களின் எண்ணிக்கை வேகமாக அதிகரித்து வருவதாக அந்த ஆர்பிஐ அறிக்கை தெரிவிக்கிறது. குறிப்பாக, தென்னிந்திய மாநிலங்களில் இந்த முதுமை அடைந்தவர்களின் விகிதம் மிக அதிகமாக உள்ளது சமூக மற்றும் பொருளாதார வளர்ச்சியில் புதிய சவால்களை ஏற்படுத்தியுள்ளது.
ரிசர்வ் வங்கியின் இந்த ஆய்வில், முதியோர்களின் எண்ணிக்கையை அடிப்படையாகக் கொண்டு மாநிலங்கள் மூன்று பிரிவுகளாகப் பிரிக்கப்பட்டுள்ளன:
- முதுமை அடைந்த மாநிலங்கள்: 15 சதவீதத்திற்கும் அதிகமான முதியோர்களைக் கொண்டவை.
- இடைநிலை மாநிலங்கள்: 10 முதல் 15 சதவீதம் வரை முதியோர்களைக் கொண்டவை.
- இளைஞர் மாநிலங்கள்: 10 சதவீதத்திற்கும் குறைவான முதியோர்களைக் கொண்டவை.
தமிழ்நாட்டின் தற்போதைய நிலை
இந்த வகைப்பாட்டின் படி, கேரளா முதலிடத்திலும், தமிழ்நாடு 15.8 சதவீத முதியோர்களுடன் இந்தியா அளவில் இரண்டாம் இடத்திலும் உள்ளன. நடப்பு 2026-ம் ஆண்டில் தமிழ்நாட்டின் மக்கள் தொகையில் கணிசமானோர் 60 வயதைக் கடந்த முதியோர் பட்டியலில் இணைந்துள்ளனர். இது வரும் 2031-ம் ஆண்டில் 20.9 சதவீதமாக உயரும் என்று ஆர்பிஐ அறிக்கை கணித்துள்ளது. அதாவது, இன்னும் ஐந்து ஆண்டுகளில் தமிழ்நாட்டின் ஐந்து பேரில் ஒருவர் முதியவராக இருப்பார் என்பது குறிப்பிடத்தக்கது.
தேசிய அளவிலான மாற்றங்கள்
கடந்த 2016-ம் ஆண்டு வரை இந்தியாவின் பெரும்பாலான மாநிலங்கள் இளைஞர்கள் அல்லது இடைநிலை மாநிலங்கள் பட்டியலில் இருந்தன. ஆனால், தற்போது தேசிய அளவில் 60 வயதைக் கடந்தவர்களின் எண்ணிக்கை 11.4 சதவீதமாக உயர்ந்துள்ளது. இது வரும் 2036-ம் ஆண்டுக்குள் 14.9 சதவீதமாக அதிகரிக்கும் எனத் தரவுகள் கூறுகின்றன. பிறப்பு விகிதம் குறைதல் மற்றும் மருத்துவ வசதிகளால் ஆயுட்காலம் அதிகரித்தல் போன்ற காரணங்களால் இந்த மாற்றம் ஏற்பட்டுள்ளது.
பொருளாதாரச் சவால்கள்
முதியோர் எண்ணிக்கை அதிகரிப்பது மாநில அரசுகளின் நிதி நிலையில் பெரும் தாக்கத்தை ஏற்படுத்தும் என ஆர்பிஐ அறிக்கை எச்சரிக்கிறது. ஓய்வூதியம் (Pension), முதியோர்களுக்கான மருத்துவச் செலவுகள் மற்றும் சமூகப் பாதுகாப்புத் திட்டங்களுக்காகத் தமிழக அரசு அதிக நிதியை ஒதுக்க வேண்டிய கட்டாயத்திற்குத் தள்ளப்படும். அதே சமயம், உழைக்கும் இளைஞர்களின் எண்ணிக்கை குறைவது மாநிலத்தின் உற்பத்தித் திறனைப் பாதிக்கலாம் என்ற கவலையும் எழுந்துள்ளது.
இந்த ஆய்வறிக்கை, எதிர்காலத் திட்டமிடலில் முதியோர் நலன் மற்றும் இளைஞர்களுக்கான வேலைவாய்ப்பு ஆகியவற்றுக்கு இடையே ஒரு சமநிலையைப் பேண வேண்டிய அவசியத்தை அரசுக்கு உணர்த்தியுள்ளது.
